Asosiy stavkani ko‘rib chiqish bo‘yicha boshqaruv qarori yuzasidan matbuot anjumani | 28.01.2026

Markaziy bank boshqaruvining 2026-yil 28-yanvardagi yig‘ilishi yakunlari: Markaziy bank asosiy stavkani 14 foiz darajasida o‘zgarishsiz qoldirdi. Inflyatsiya pasayishda davom etmoqda: 2025-yil dekabr oyida umumiy inflyatsiya 7,3% gacha, bazaviy inflyatsiya 5,7% gacha tushdi. Inflyatsiyaning pasayishi qat’iy pul-kredit siyosati, so‘mning mustahkamlanishi va import narxlari ta’sirida bazaviy inflyatsiyaning sekinlashishi hisobiga ta’minlanmoqda. Xizmatlar sohasida narxlar o‘sishi yuqori saqlanib qolmoqda. 2026-yil yakunlari bo‘yicha inflyatsiya 6,5% atrofida bo‘lishi kutilmoqda. Iqtisodiyotda yuqori faollik saqlanib qolmoqda: 2026 yil yakuni bo‘yicha iqtisodiy o‘sish 6,5–7% atrofida shakllanishi prognoz qilinmoqda. Bank tizimida ijobiy real foiz stavkalari milliy valyutadagi jamg‘armalarni rag‘batlantirmoqda. Chakana kreditlash va fiskal faollik yuqori sur’atlarda davom etmoqda. Pul-kredit sharoitlari inflyatsiyaning barqaror pasayishini ta’minlash maqsadida joriy qat’iy darajada saqlab qolinadi. Asosiy stavkani navbatdagi ko‘rib chiqish 2026-yil 18-mart kuniga belgilangan.